Највпечатливиот симбол на Велигден е зајак кој носи шарени јајца во корпа. Многу обичаи и симболи се поврзани со животот на Христос, а особено со неговото воскресение, а постојат неколку теории за тоа од каде потекнуваат.
Зајакот не е спомнат во Библијата, ниту во некоја православна книга. Тоа нема никаква врска со животот на Христос, па се претпоставува дека потекнува од паганска традиција. Зајакот, пролетта, јајцата и секако новиот Христов живот имаат една заедничка симболика: тоа е повторното раѓање. Зајаците се поврзани со нов живот поради нивната брза репродукција и големиот број млади што женката ги носи на светот одеднаш. Пролетта е годишно време кога природата оживува по зимата. Од друга страна, јајцата се суштински симбол на раѓање.
Зајакот е животно со натприродни својства. Се верувало дека тие можат да ја предвидат иднината, а некои делови од телото на зајакот се сметале за лековити. Симболот на зајакот што носи јајца доаѓа од легендата за пролетната божица Еостре. Приказната вели дека еден ден божицата пронашла мала птица во шумата која мрзнела и умирала во снегот. Божицата се сожалила и ја претворила во зајак за да и даде крзно што ќе ја стопли и ќе и го спаси животот. Бидејќи некогаш бил птица, зајакот продолжил да снесува јајца. Секоја година ги сликал во различни бои и и ги подарувал на божицата во знак на благодарност што му го спасила животот.
Друга приказна е поврзана со паганските обичаи. Во Месопотамија, јајцето се поврзувало со божицата на плодноста Астарта. Долго пред доаѓањето на христијанството, луѓето секоја пролет си давале јајца, бидејќи и тогаш биле симбол на нов живот и раѓање. Богатите имале можност да ги покријат јајцата со златни листови, додека сиромашните ги бојадисувале со различни треви.
Во древниот Египет, луѓето верувале дека Земјата излегла од јајце. Старите Египќани и Грци ставале јајца во гробовите на своите мртви. Уште од претхристијанско време јајцето се сметало за почеток на се, нешто исконско од кое се создало се што постои. Во христијанскиот свет е обичај да се подарува шарено јајце за Велигден бидејќи тоа носи среќа и бериќет.
