Освен што освежува во текот на жешките летни денови, краставицата може да му помогне на организмот да го исфрли вишокот течности, да го зачува здравјето на бубрезите и да придонесе за негуван изглед на кожата.
Нутриционистите тврдат дека широко распространетото мислење дека краставицата нема никаква хранлива вредност е целосно погрешно.
Нејзиниот биолошки состав, кој содржи минерали и витамини, вклучувајќи го и витаминот Ц, го докажува спротивното. Овој освежителен зеленчук, кој во најголем дел е составен од вода, го регулира крвниот притисок, ги штити бубрезите и го намалува чувството на глад.
Природен диуретик
Краставицата е најбогата со витамин Ц, а во помали количества содржи и витамини од групата Б, како и каротен.
Од минерали содржи фосфор, калциум, железо, манган и јод. Има малку натриум и многу калиум, па затоа не се препорачува претерано солење, за да не се наруши поволниот сооднос меѓу овие два минерали.
Токму поради ваквиот сооднос на натриум и калиум, краставицата е одличен природен диуретик. Затоа се препорачува при отежнато мокрење, заболувања на срцето и бубрезите, како и кај ревматски тегоби.
Бидејќи помага во растворањето на мочната киселина, корисна е за лицата кои имаат камења во бубрезите и мочниот меур. Исто така, со поттикнување на исфрлањето на водата од организмот, помага и во елиминирањето на штетните материи. Се препорачува и за дијабетичари, бидејќи придонесува за намалување на нивото на шеќер во крвта.
Нега на кожата
За еден од најпознатите начини за намалување на подочниците и темните кругови под очите се користи токму свежата краставица.
Овој зеленчук содржи аскорбинска и кофеинска киселина, кои спречуваат задржување на вода во организмот, а со тоа и појава на отоци. Краставицата има и разладувачко дејство, па често се користи за ублажување на последиците од сончеви изгореници.
Таа е богата со калиум, магнезиум и силициум, поради што многу велнес центри нудат различни третмани во кои се користи краставица.
Во домашни услови, доволно е да излупите половина краставица, да ја исечкате на коцки, да додадете една лажица мед и добро да измешате. Маската нанесете ја на чисто лице, оставете ја да делува 20 минути, а потоа исплакнете со млака вода.
Овие две состојки ѝ обезбедуваат дополнителна хидратација на кожата и го прават тенот нежен и мек. Сокот од краставица може да се користи и како одличен природен тоник.
Доколку немате навика да пиете доволно вода, јадете разладени краставици, бидејќи тие содржат дури 90 проценти вода.
Ден потоа
Краставицата може да помогне и против мамурлак. Ако сте испиле повеќе алкохол отколку што треба, изедете неколку парчиња краставица пред спиење.
По ваков третман ќе се разбудите посвежи и без главоболка. Краставицата содржи доволно природни шеќери, витамини од групата Б и електролити за да ги надополни основните хранливи материи што телото ги изгубило.
