Пејачот Андреј Ѓоргиески од групата ДНК загина во пожарот во Кочани, дознава „360 степени“ од болнички извори.
Штипската телевизија ТВ Стар објави дека загинал и Филип Стевановски од Куманово – придружен член на дуото ДНК. Во пожарот загина и тапанарот на ДНК, Горги Горгиевски, од
Струмица.
Факултетот за музичка уметност ја потврди смртта на професорката Сара Пројковска.
„Со длабока жалост и неверица ве известуваме дека нашата колешка, вонреден професор м-р Сара Пројковска, го загуби животот во невидената трагедија во Кочани. Нашата Сара, полна со љубов, живот и музика, лавица и добрица…“, соопшти Факултетот.
Пројковска беше придружен вокал на бендот ДНК.
Во пожарот во дискотеката „Пулс“ во Кочани загинаа најмалку 59 луѓе, а 155 се повредени. За четири лица е распишана централна потерница, информираше министерот за внатрешни работи Панче Тошковски.
