Од 8 до 10 октомври во Приштина ќе се одржи 102. семинар “Rouz-Rot” на Парламентарното собрание на НАТО, на тема „Евроатлантска интеграција на Западен Балкан, проширени предизвици, нови реалности и идни перспективи“.
На семинарот, кој ќе трае три дена, се очекуваат повеќе од 100 учесници, меѓу кои и претставници од земјите членки на НАТО и земјите партнери.
Како што соопшти Собранието на Косово, на семинарот ќе се разговара за идните предизвици и перспективи на Западен Балкан во променливото европско безбедносно опкружување, поддршката на НАТО за мирот и стабилноста во регионот, управувањето и реформите на безбедносниот сектор во Косово, како и парламентарниот надзор над безбедносните институции во Косово.
„Законодавците на НАТО, претставници на косовските институции, како и институции и различни меѓународни организации, ќе разговараат и за перспективата на европската интеграција и напредокот на Косово досега, економската ситуација во регионот по Ковид-19, улогата на младите во градењето одржливи општества, за безбедност и стабилност на Западен Балкан, политички и безбедносни случувања во Босна и Херцеговина. Импликациите од војната во Украина врз Западен Балкан, импликациите од влијанието на Русија врз Западен Балкан, придонесот на жените за регионалниот мир и безбедност, нивното политичко учество на Косово, како и зајакнувањето на владеењето на правото и ќе се разговара за борба против корупцијата“, се наведува во соопштението.
Семинарот се организира во соработка со Собранието на Косово, под раководство на шефот на Делегацијата на Собранието на Косово во НАТО, пратеникот Дритон Хисени, како и со поддршка на швајцарската влада.
Главната цел на семинарот е да го олесни дијалогот за регионалните безбедносни прашања меѓу законодавците на НАТО и земјите партнери.
