Патувањето со воз е голем тренд во последните години. За многу патници тоа не е само превозно средство, начин да се стигне од точка А до точка Б, туку искуство кое често останува најубавиот дел од патувањето.
Бројните панорамски железнички рути водат низ неверојатни пејсажи, недопрена природа, обезбедуваат незаборавни глетки, внесуваат допир на романтика и аватуризам во самото патување. Но, дали некогаш сте се запрашале кој е најбавниот воз во Европа?
Глечер Експрес во Швајцарија се гордее со тој прекар. Неговата просечна брзина е 36 километри на час.
Овој самопрогласен „најбавен експресен воз во светот“ ги поврзува популарните швајцарски дестинации – Цермат и Санкт Мориц. Како и многу швајцарски возови, Глечер Експрес сообраќа непречено, и покрај карпестата планинска рута. Преминува 291 мост и поминува низ 91 тунели. Конечно, се искачува до превојот Обералп, кој се наоѓа на 2.044 метри надморска височина – во текот на целата година, дури и кога има снег.
Оваа железничка рута според многумина е вистинско инженерско чудо, а подеднакво импресивна е и внатрешноста на возот, каде патниците можат да уживаат во менито кое нуди храна, грицки, убаво вино и попладневен чај, додека погледот лета кон алпската дивина како моќен магнет.
Патот води низ прекрасни пејсажи
Една од почетните/крајните точки на Глечер Експрес, Санкт Мориц е вистински рај за сите оние кои практикуваат зимски спортови (градот беше домаќин на две Зимски олимписки игри). Но, ако не сакате скијање или сноуборд, наместо тоа, можете да се одлучите за планинарење, планински велосипедизам или дури и одење по познатата патека за боб. За оние кои не се баш љубители на потењето или адреналинот, Санкт Мориц има голем број продавници, големи хотели и навистина се што ви треба за да се опуштите со стил.
Живописниот Хур е најстариот град во Швајцарија
Глечер експрес се протега помеѓу Санкт Мориц и Зермат, но не мора да го започнете своето патување на тие станици. За многу патници, градот Хур е одлична почетна точка. Често се нарекува најстариот град во Швајцарија, со археолошки локалитети кои датираат илјадници години. Необичниот Стар град без автомобили е добро сочуван и одлично место за прошетка. Овде ќе ја најдете најголемата концентрација на ресторани и барови во земјата и најголемиот трговски центар помеѓу Цирих и Милано.
Зермат е едно од најдобрите одморалишта во Швајцарија
Зермат, другата главна почетна/крајна точка на Глечер Експрес, е високо рангирана меѓу најдобрите швајцарски одморалишта. Покрај одличното скијање, планинарење и искачување, овде можете да го видите и Матерхорн – митска планина што е желба на секој вистински алпинист. Она што е посебно за овој град е што тука се забранети автомобили, а поради близината со Италија, Зермат има изразен космополитски дух.
Од прекрасни дрвени куќи, шармантни кафулиња до луксузни продавници – овој скриен рај сместен длабоко во срцето на швајцарските Алпи ќе ве воодушеви и ќе ве натера да се враќате повторно и повторно, во различни периоди од годината.