Стихови од македонските поп песни „Обои ме“ од Калиопи, „Немирна ко ветер“ од Тамара Тодевска, „Обиди се“ од Ребека, „Би се викал те сакам“ од „Нокаут“, „И ќе биде сѐ во ред“ од Каролина, „Јас сум ти пријател“ од „Ареа“ кои како виртуелни графити деновиве се хит на социјалните мрежи, а ги црта Тина Мицковска, диџејка и активистка за заштита на животните, која е вработена во Зоолошката градина во Скопје.
„Како голем поддржувач на македонската музика низ годините, која како новинар и диџеј отсекогаш сум ја афирмирала ми дојде идеја да направиме улични графити со најубавите македонски песни, а некои од нив и беа малку подзаборавени. Се почна со виртуелни графити со песните во позадина кои на Инстаграм веднаш станаа вирални, а ги поддржаа и споделија сите наши најголеми музички ѕвезди. Сега останува вториот дел од проектот да се реализира, односно оној потешкиот – Да се направи Парк на македонската музика во Скопје каде што овие графити ќе бидат исцртани и во реалноста.
Мило ми е што преку масовното споделување на овие графити, докажавме дека кај нас се цени и се слуша македонската музика и со тоа им дадовме ветер во грб на македонските артисти да творат и понатаму.“ – изјави Тина Мицковска.
