„Вашингтон пост“, повикувајќи се на обелоденети тајни документи на Пентагон, тврди дека руските ловци SU-27 за малку ќе собориле извидувачки авион на британските воздухопловни сили RC-135 Rivet Joint над Црното Море во есента 2022 година.
„Руски борбен авион за малку ќе собореше британски извидувачки авион минатата година… Инцидентот беше позначаен отколку што беше првично обелоденето и можеше директно да ги вовлече САД и нивните сојузници од НАТО во војната во Украина“, пишува весникот.
Како што соопшти претходно британскиот министер за одбрана Бен Валас, невооружениот разузнавачки авион RC-135 River Joint вршел рутинска патрола над Црното Море на 29 септември кога бил пресретнат од два руски борбени авиони SU-27. Меѓутоа, за време на пресретнувањето, еден од ловците SU-27 испука проектил во близина на авионот RC-135 River Joint без визуелен контакт со целта. Тој додаде дека за инцидентот разговарал директно со рускиот министер за одбрана Сергеј Шојгу и дека проверката што ја извршиле руските власти покажала дека SU-27 истрелал проектил по грешка.
За разлика од британскиот министер за одбрана, кој не укажа на ризикот од соборување на британскиот авион, документите на Пентагон го опишуваат настанот како инцидент во кој RC-135 „речиси беше соборен“.
