Стапката на неухранетост во Авганистан е на рекордно високо ниво, а половина од земјата се соочува со силен глад во текот на годината, изјави денеска портпаролот на Светската програма за храна на Обединетите нации, Филип Кропф.
– Половина од Авганистан страда од силен глад во текот на целата година, без оглед на сезоната, а стапката на неухранетост е на рекордно високо ниво за Авганистан – рече Кропф.
Сиромаштијата и гладот погодија милиони луѓе во Авганистан кога Талибанците ја презедоа власта во август 2021 година, откако странската помош престана речиси преку ноќ, пишува АП.
Санкциите за талибанските лидери, суспендираните трансфери меѓу банките и замрзнатите милијарди во финансиските резерви на Авганистан го ограничија пристапот до меѓународните институции и странските пари од кои зависеше економијата на земјата пред повлекувањето на силите на САД и НАТО.
– Седум милиони деца (помлади од пет години) и мајки се неухранети во земја со 40 милиони жители – рече Кропф.
Авганистанците не гладуваат, додаде тој, но веќе немаат ресурси да спречат хуманитарна криза.
Хуманитарните организации им помагаат на Авганистанците кога станува збор за храна, образование и здравје, но и греење, пари за гориво и топла облека.
Сепак, дистрибуцијата беше сериозно погодена од забраната на жените во Авганистан да работат во државни и меѓународни невладини организации.
– Забраната дојде во најлошиот можен момент. Семејствата и заедниците не знаат од каде е нивниот следен оброк – рече Кропф.
Светската програма за храна ги зголеми испораките пред зимата, но нивната работа е попречена од фактот што 19 партнерски невладини организации престанаа да работат во земјата поради забраната на Талибанците.
По одлуката за забрана донесена на 24 декември минатата година, 115 од 437 мобилни здравствени амбуланти престанаа да работат, при што беа погодени 82.000 деца, бремени жени и доилки.
Паузирани се и програмите со кои се доставува храна до училиштата за ужина, што влијае на 616.000 ученици.
Локалните лекари тврдат дека бројот на пациенти во последно време е зголемен и дека во недостиг на храна и лекови, дури и мала болест може да се претвори во голем проблем.
Заменик-генералниот секретар на ОН Амина Мохамед вчера изјави дека ги користела „сите средства“ за време на состаноците со претставниците на талибанците во Авганистан за да се обиде да ја поништи нивната одлука и ги повика муслиманските земји да им помогнат на талибанците да се преселат од „13. век до 21 век“.
