Шведскиот квартет „Стенхамар“ вечерва ќе настапи во црквата „Света Софија“ во рамки на 62. издание на фестивалот „Охридско лето“.
Во составот членуваат виолинистите Петер Олафсон и Пер Оман, Тони Бауер на виола и Матс Олофсон на виолочело.
Основан во 1995 година, квартетот „Стенхамар“, како што соопшти националната установа „Охридско лето“, низ годините се профилира како еден од најинтересните и многу респектирани квартети во Скандинавија.
– Нивното енергично, а истовремено технички рафинирано музицирање придонесува тие редовно да бидат присутни на фестивали за камерна музика не само во Шведска, туку и во Англија, Полска, Германија, Данска, Финска, Алжир, Индија и Јапонија. Нивниот репертоар во голема мера се фокусира на делата на Стенхамар и на дела од шведски композитори, но тие не ги занемаруваат делата од други, значајни композитори кои твореле за ваков состав, ставајќи посебен акцент на современата музика, стои во информацијата.
Досега нарачале и премиерно извеле повеќе од 30 дела од современи композитори. Во 2021 квартетот дебитирал во „Бетовен хаус“ во Бон и на фестивалот во Оксфорд. Од 2017 тие имаат уметничка резиденција на Универзитетот во градот Оребро.
