Паметните телефони веќе следната година би можеле значително да поскапат, но не поради инфлација или агресивен маркетинг, туку поради драстичниот раст на цените на мемориските чипови, кој го поттикнува глобалната побарувачка за вештачка интелигенција.
Како што компаниите како Samsung ги пренасочуваат производствените капацитети од мобилни уреди кон попрофитабилните AI дата-центри, пазарот на телефони останува без доволна количина клучни компоненти.
Xiaomi во резултатите за третиот квартал потврди дека растот на цените на меморијата директно ќе влијае на малопродажните цени на уредите. Претседателот на компанијата, Лу Вејбинг, предупреди дека телефоните следната година речиси сигурно ќе бидат поскапи отколку оваа, бидејќи растот на трошоците станал преголем за производителите да го апсорбираат без зголемување на цените.
Покрај тоа, иако бројот на испорачани уреди останал стабилен – околу 43,3 милиони – глобалната просечна цена на телефоните благо опаднала, додека во Кина, благодарение на поголемиот удел на премиум модели, е забележан раст. Оваа промена во структурата на продажбата значително ги поттикнала финансиските резултати на компанијата: нето-профитот скокнал импресивни 130 проценти, а вкупните приходи пораснале за 22,3 проценти.
Зошто поскапувањето нема да биде краткотрајно?
Пазарот за AI инфраструктура во моментов е подготвен да плати многу повеќе за истите мемориски чипови отколку мобилната индустрија, па производителите природно им даваат приоритет на серверските нарачки и на деловите наменети за попрофитабилните, премиум сегменти.
Според зборовите на Лу Вејбинг, дури ни растот на цените на мобилните телефони нема целосно да ги покрие зголемените трошоци, што укажува на подлабоки промени во стратегијата – од поместување на позиционирањето на уредите до намалување на профитните маржи.
