Највпечатлив симбол на Велигден е зајакот кој носи шарени јајца во корпа. Многу обичаи и симболи се поврзани со животот на Христос, особено со неговото воскресение, но постојат неколку теории за тоа од каде потекнуваат.
Зајакот не е спомнат во Библијата, ниту во некоја православна книга. Тој нема никаква врска со животот на Христос, па се претпоставува дека потекнува од паганска традиција. Зајакот, пролетта, јајцата и, секако, новиот Христов живот имаат една заедничка симболика: тоа е повторното раѓање. Зајаците се поврзуваат со нов живот поради нивната брза репродукција и големиот број млади што женката ги раѓа одеднаш. Пролетта е годишно време кога природата оживува по зимата. Од друга страна, јајцата се суштински симбол на раѓање.
Зајакот е животно на кое некогаш му се припишувале натприродни својства. Се верувало дека може да ја предвиди иднината, а некои делови од неговото тело се сметале за лековити. Симболот на зајакот што носи јајца потекнува од легендата за пролетната божица Еостре. Приказната вели дека еден ден божицата пронашла мала птица во шумата која мрзнела и умирала во снегот. Божицата се сожалила и ја претворила во зајак, за да ѝ даде крзно што ќе ја стопли и ќе ѝ го спаси животот. Бидејќи некогаш била птица, зајакот продолжил да снесува јајца. Секоја година ги бојадисувал во различни бои и ѝ ги подарувал на божицата во знак на благодарност што му го спасила животот.
Друга приказна е поврзана со паганските обичаи. Во Месопотамија, јајцето се поврзувало со божицата на плодноста Астарта. Долго пред доаѓањето на христијанството, луѓето секоја пролет си подарувале јајца, бидејќи и тогаш биле симбол на нов живот и раѓање. Богатите имале можност да ги покријат јајцата со златни листови, додека сиромашните ги бојадисувале со различни треви.
Во древниот Египет, луѓето верувале дека Земјата произлегла од јајце. Старите Египќани и Грци ставале јајца во гробовите на своите мртви. Уште од претхристијанско време, јајцето се сметало за почеток на сè — нешто исконско од кое се создало сè што постои. Во христијанскиот свет, обичај е да се подарува шарено јајце за Велигден, бидејќи тоа носи среќа и бериќет.
