Пожарникарите во Струмица од овој месец ќе бидат најплатени во цела Македонија, најави градоначалникот на општината, Костадин Костадинов. Според новите решенија, нивната плата ќе изнесува 80.000 денари – како признание за нивната храброст и секојдневна пожртвуваност.
„Ова е најмалку што можеме да направиме за луѓето кои секој ден го ризикуваат својот живот за да спасат туѓ. Истовремено, покрај пожарникарите, и сите вработени во општинската администрација ќе добијат 20% зголемување на примањата согласно колективниот договор. Тоа е начин да покажеме дека трудот и посветеноста не остануваат без вредност,“ изјави Костадинов.
Тој додаде дека одлуката не е само финансиски потег, туку и јасна порака на почит и благодарност.
„Ова е симбол на ново време – време кога храброста и чесниот труд се ставаат на пиедестал. Од денеска, секој пожарникар и секој општински работник знае дека неговиот град стои зад него, не само со зборови, туку и со дела,“ истакна градоначалникот.
