Велики петок, познат и како Велипеток или Распет петок, е најтажниот ден во христијанскиот календар. Овој ден го одбележува распнувањето на Исус Христос – симбол на најголемата жртва од љубов и вера. Ден кога небото се затемнило, а земјата се затресла од болка.
Црквата го одбележува овој ден со длабока тишина, молитви и свештен чин – вечерна богослужба во чест на симнувањето на Христовото тело од крстот. Пред олтарот се поставува посебно украсена прекривка – симболичен гроб на Спасителот. Верниците со трепет ја обиколуваат црквата трипати, со тропала и со молитви за простување и спасение.
На Велики петок не се јаде, не се пие – се пости строго, само со вода. Тоа е ден за духовно прочистување и молк, ден кога се откажуваме од сè земно, за да се потсетиме на скапоцената жртва за човештвото.
Црвените велигденски јајца, кои се вапсуваат денес, ја претставуваат Христовата крв и навестуваат надеж – надежта во Воскресението што следи.
На овој ден, не се работи, не се слави, не се врева. Велики петок е ден за тишина, молитва и длабоко внатрешно покајание. Нека ни биде потсетник дека без страдањето – нема Воскресение.
