Светското првенство во Катар започнува на 20 ноември. Фудбалските селекции на Катар и Еквадор ќе бидат првите две селекции кои ќе влезат на теренот на стадионот Ал Бајт.
За престижниот трофеј ќе се борат вкупно 32 екипи, а на првенството ќе се одиграат 64 натпревари во период од 29 дена на 8 стадиони.
Во продолжение ќе ви откриеме уште неколку интересни факти за Светското првенство во Катар.
Тоа е прво Светско првенство во фудбал што се одржува во зимскиот период
Светското првенство во Катар 2022 година ќе ја прекине својата традиција и наместо во летниот период, како што беше обичај досега, ќе се одржува од средината на ноември до средината на декември. Со оглед на тоа што температурите во Катар во текот на летните месеци достигнуваат и до 50 степени Целзиусови, би било навистина премногу топло да се излезе надвор, а камоли да се спортува.
Катар е првата земја на Блискиот Исток која е домаќин на Светското првенство во фудбал
Катар наскоро ќе стане првата блискоисточна и трета азиска земја домаќин на Светското првенство. Јапонија и Јужна Кореја беа кодомаќини во 2002 година.
Екипите во првенството ќе имаат можност да заменат пет играчи во текот на еден натпревар
Досега на Мундијалот беше правило дека селекциите можеа да направат три измени на еден натпревар и уште една доколку се игра продолженија. На турнирот во Катар, пак, селекторите на репрезентативците ќе имаат можност да направат пет измени.
На Светското првенство за мажи за првпат ќе судат жени
Меѓу 36-те судии избрани за турнирот има и 3 жени: Јошими Јамашита од Јапонија, Салима Мукансанга од Руанда и Стефани Фрапарт од Франција.
На Светското првенство во фудбал во 2022 година ќе се користи полуавтоматска технологија за офсајд и гол линија
Натпреварите ќе имаат полуавтоматски офсајд и технологија за гол-линијата, што значи дека кога играчот е во офсајд или топката ќе ја помине гол линијата, ќе се огласи соодветниот сигнал, така што судиите нема да мора многу да размислуваат што навистина се случило во спорни ситуации.
Овие технологии се успешно тестирани на бројни натпревари и турнири на ФИФА досега, вклучувајќи го Арапскиот куп на ФИФА во 2021 година и Светското клупско првенство на ФИФА во 2021 година.