Сите сопственици на кучиња сакаат најдобро за своите миленици, а една од клучните работи за нивното здравје и среќа е доволното движење. Но, колку често треба да го шетате вашето куче? Тоа е прашање кое ги мачи многу сопственици, а одговорот не е универзален бидејќи секое куче има свои специфични потреби.
Ветеринарката Витни Милер објаснува дека зачестеноста и времетраењето на шетањата зависат од возраста, расата, големината и здравствената состојба на кучето.
Додека на некои кучиња им се потребни подолги и поинтензивни прошетки, други може да се задоволат со лесна прошетка во домашни услови.
Воопшто, на возрасните кучиња им се потребни околу 20 до 45 минути умерена активност двапати дневно, што може да вклучува брза прошетка.
Но, енергичните раси, како што се бордер коли или австралиските овчари, можат да бараат и до три часа активност дневно.
Од друга страна, многу малите кучиња или постарите миленици можат да ги задоволат своите потреби за движење со лесни прошетки низ домот.
Зошто се важни редовните прошетки?
Играта и трчањето во дворот секако се корисни, но прошетките нудат посебни предности кои ги прават неопходен дел од животот на секое куче.
Покрај тоа што помагаат во одржувањето на кондицијата, прошетките позитивно влијаат на менталното здравје на кучето бидејќи му овозможуваат истражување на околината и интеракција со други луѓе и животни.
Кучињата го доживуваат светот главно преку мирисите, па дозволувањето да истражуваат различни мириси за време на прошетките претставува форма на стимулација и збогатување на нивното секојдневие.
Прошетката исто така е совршена прилика за дополнителна обука и зајакнување на врската меѓу кучето и сопственикот. За време на прошетката, кучето може да учи нови правила на однесување, додека вие можете да работите на позитивно поттикнување и подобрување на комуникацијата со вашиот миленик.
Покрај тоа, прошетките се одлична можност и за сопствениците да поминат време на свеж воздух и да ја подобрат сопствената физичка активност.
Што ако немате време да го шетате кучето доволно често?
Секако, животниот распоред не е секогаш идеален и понекогаш едноставно не е можно секој ден да се посвети доволно време за прошетка со миленикот.
Но, постојат низа алтернативни активности кои можат да бидат подеднакво корисни. Ако сте во теснец со времето, играњето со топче во дворот, во станот или дури и во ходникот може да му помогне на кучето да остане активно.
Пливањето, тренингот за агилност и други видови вежби исто така можат да бидат добра замена за класичната прошетка.
Ако не сте сигурни кои активности најмногу одговараат на вашето куче, најдобро е да се консултирате со ветеринар за да ја пронајдете најздравата опција.
И ако распоредот никако не ви дозволува доволно време за прошетки, ангажирањето шетач за кучиња може да биде вредна инвестиција – вашиот миленик ќе ви биде благодарен, а вие ќе имате помирна совест.