Меркур, планетата на комуникацијата, кој до 8 април беше ретрограден, го менува знакот и на 16 април влегува во Овен, каде што ќе остане до 10 мај.
Меркур во Овен носи поволни вести и преговори за Овните, Лавовите и Стрелците, но и брзина, директност и одлучност во начинот на размислување и комуникација.
Луѓето со ваква поставеност на Меркур размислуваат брзо, донесуваат одлуки инстинктивно и ретко се задржуваат на детали. Нивниот стил на изразување е директен, понекогаш дури и импулсивен, но секогаш искрен. Сакаат да бидат први во сè, па така и во изразувањето идеи – немаат трпение да чекаат ред во разговор и често прекинуваат други затоа што чувствуваат дека ќе ја изгубат мислата ако веднаш не го кажат тоа што го мислат.
Нивниот ум е преполн со нови идеи, но поради нетрпеливост може да прескокнат важни чекори или да ги превидат чувствата на другите при комуникацијата. Имаат талент да ги мотивираат другите со својата страст и убедливост, но може да делуваат како да го наметнуваат своето мислење. Оваа поставеност на Меркур носи остроумност и продорност, но и потреба да се научи како да се застане, сослуша и разгледа и друга перспектива.
Во учењето се брзи, но лесно може да се заситат ако нешто не им го задржи вниманието. Сакаат предизвици и натпреварување, па особено добро ќе се покажат во ситуации каде што е потребно брзо размислување и одлучност. Ако научат да ја контролираат импулсивноста, Меркур во Овен може да донесе одлична комбинација на иницијатива, храброст и интелектуална енергија.