КУЛТУРА

И Сараево се омрси од „Кајмак” на Манчевски – Фотогалерија од црвениот килим

Извонреден прием со преполно гледалиште, многу смеа и апалаузи имаше синоќа „Кајмак” на најтрофејниот македонски режисер Милчо Манчевски на Сараевскиот филмски фестивал. Актерката Ана Стојановска во спектакуларно издание освои со настапот на црвениот килим со екипата на „Кајмак” заедно со режисерот Манчевски, колегата Филип Трајковиќ и продуцентот Јане Ќортошев, пред проекцијата во програмата Open Air во која на отворено се прикажуваат хитовите на годината.
„Кајмак” ќе продолжи да игра и во кината низ БиХ.

red carpet interview

„Со ‘Кајмак’ го омрсивме Сараево. Убаво е кога некој ви ја цени работата, трудот и уметноста”, изјави Манчевски кој во Сараево има третман на легенда на европската кинематографија.

Kaymak Sarajevo1

Како и вобичаено, неговото присуство на фестивалите предизвикува голем интерес кај медиумите, а во Сараево покрај бројните беше ангажиран и за три големи, детални интервјуа за Радио БиХ, Танјуг, и телевизијата Н1. Како гостин на Фестивалот, Манчевски доби и почесно место на вечерата со годинешните лауреати, шкотската режисерка Лин Ремзи и американскиот оскаровец сценаристот Чарли Кауфман.

„Кајмак” овојмесец продолжува со успешниот фестивалски живот, а на 23 август ќе биде и американската премиера на 33-то издание на Синеквест во Калифорнија, еден од најголемите и најреномираните независни фестивали на американскиот континент, специфичен по програмата што поддржува иновативни и креативни уметнички дела. До крајот на август и почетокот на септември, „Кајмак” ќе биде прикажан на уште четири европски фестивали.
Во јуни „Кајмак” ја имаше и данската премиера во Копенхаген.

Kaymak Sarajevo 2023 3jpg

„Кајмак” е еден од македонските филмови кои имаат најширок пласман во светот. Иако македонски, филмот е со повеќе од 50% финансиран од странски државни фондови. Тој е продаден за редовна дистрибуција во педесетина земји од Европа, Северна Америка, Јужна Америка, Централна Америка, Карибите – од Аргентина, Бразил и Мексико до Грција, Кипар и Холандија, од Јамајка, Аруба, Барбадос до Албанија и Бугарија; од Парагвај и Хаити до Суринам, Гвајана и Ст. Китс и Невис… Понатамошниот процес на пласман е во тек.

Kajmak Sarajevo 2023 2

„Кајмак” ја имаше светската премиера на фестивалот во Токио (А-категорија), потоа продолжи со фестивалска турнеја во Тајпеј, Португалија, Италија, Бугарија, Србија и други, каде што беше поздравен со неколкуминутни стоечки овации и бројни написи во локалните медиуми. Филмот ја освои Специјалната награда на жирито на „Фантаспорто” во Португалија, а Сара Климоска беше прогласена за најдобра актерка на фестивалот во Сомбор, Србија.

Kajmak Sarajevo 2023 1

„Кајмак” беше најгледан филм во Македонија минатата година.

Во оваа македонско-данско-холандско-хрватска копродукција поддржана од Еуримаж главните улоги ги толкуваат: Сара Климоска, Александар Микиќ, Камка Тоциновски, Ана Стојановска, Сара Спировска, Филип Трајковиќ и Петар Мирчевски. Директор на фотографија е Данецот Улрик Боел Бенцен, монтажер Холанѓанецот Емил Нуненга, музиката е на Данскиот гудачки квартет и на Игор Василев-Новоградска, дизајнер на продукцијата е Британецот Дејвид Манс, дизајнер на шминка Италијанецот Марио Микисанти, а кастинг директор е нашата Милка Анчевска. Продуцент е Јане Ќортошев, а копродуценти Мета Фолдагер, Мете Борч, Синиша Јуричиќ и Елс Вандеворст. Извршен продуцент е Ијан Прајор.

Kajmak Sarajevo 2023

Subscribe
Notify of
0 Коментари
Inline Feedbacks
View all comments
Back to top button
close